Едно момче во Пакистан се полеало со бензин и се запалило затоа што неговите родители немале пари да му купат училишна униформа. Лекарите не можеле да го спасат.
Камран Кан (13) денеска умрел од изгореници кои му зафатила 65% од телото, а со кои се здобил на 24 март.
Семејството на Кан, како и многу други во Пакистан, немало пари за да го школува момчето.
„Бесплатното школување му го овозможи локално приватно училиште, поради резултатите кои ги покажуваше“, рече постариот брат на момчето, Салим.
Камран минатиот месец барал од мајка си училишна униформа, но таа го одбила, кажувајќи му дека семејството нема пари.
На неговото инсистирање, мајката изгубила трпение и му залепила шлаканица, по што тој истрчал од куќата, порачувајќи дека ќе се убие, рече брат му на Камран.
Момчето се полеало со бензин и се запалило и со тешки изгореници е префрлен во болница во Пунџаба. Меѓутоа, семејството можело да плати само десетина од околу 5.500 долари неопходни за неговото лечење.
Месечната школарина во Пакистан изнесува околу два долари месечно, но дури и тоа е премногу за сиромашните Пакистанци, кои имаат многу деца.
