Европската радиодифузна агенција го одбила барањето на Радиотелевизија Косово да стане активен член на оваа организација и со тоа да добие можност Косово самостојно да настапува на Песна за Евровизија во Азербејџан.
„Косово не може да и се придружи на Европската Радиодифузна Унија (EBU) како полноправен член и не може да учествува на натпреварувањето за Песна за Евровизија“, се наведува во одговорот на EBU на барањето на Радиотелевизија Косово да стане активен член на оваа организација.
Директорот на EBU, Ингрид Делтенре, на состанокот во Женева известила за писмото на заменик министерот за надворешни работи на Косово, Петрит Селими, во кое се наведува колку е важно за Косово да учествува на Евровизијата.
Делтенре ја пренела оценката на Селими дека EBU е „суштински важна“ за Косово и дека „во градењето на нацијата ништо не е поважно од Песна за Евровизија“.
Меѓутоа, во одговорот на EBU се напоменува дека таквото членство во таа организација е можно само за емитерите во земјите кои припаѓаат на Меѓународната унија за телекомуникации (ITU), а Косово не е примено во ITU.
Учеството на пејачката Рона Нишлиј, родена во Косовска Митровица, на овогодинешната Евровизија не се доведува во прашање, затоа што таа е избрана како претставничка на Албанија, а не како претставничка на Косово.
