Утре, сабота, од 20.30 до 21.30 часот исклучете ги светлата и уредите на електрично напојување и дадете придонес за спасување на планетата Земја...

Оваа година во знак на солидарност кон петина од светското население кое сѐ уште нема пристап до електрична енергија, ОН, УНЕСКО и “Greenpeace” повикуваат утре во 20.30 часот да ги исклучите светлата.

“Ако утре ги исклучиме светлата, можеме заедно да создадеме посветла иднина”, порачува Бан Ки Мун, генерален секретар на ОН.

Во сабота на еден час ќе бидат изгаснати и светлата на многубројни светски споменици и атракции, како Бакингамската палата, Кинескиот ѕид, Ајфеловата кула, Атомиум, кулата Бурџ Калифа во Дубаи, катедралата Нотр Дам, кралската палата во Бангкок.

“Час на Земјата” е светска иницијатива која се одржува секоја последна сабота во март. Првиот беше во организација на Светскиот фонд за заштита на природата (WWF) и весникот “Sydney Morning Herald” во март 2007. Тогаш 2,2 милиони жители на Сиднеј ги изгасија светлата на еден час. Потоа оваа иницијатива ја прифатија и други светски градови.