Француската влада им наредила на службениците терминот „госпоѓица“ да се исфрли од употреба во официјалните документи во Франција, што денеска беше поздравено од феминистките во оваа земја.

До сега жените морале на даночните пријави, барањата за исплата на осигурување и во многу други документи да назначат „госпоѓа“ или „госпоѓица“ (madame или mademoiselle) и така да откријат дали се омажени или не.

Во синоќешното циркуларно писмо од кабинетот на францускиот премиер Франсоа Фиона наложено е наместо терминот „госпоѓица“ да се користи „госпоѓа“.

Феминистичките здружувања во септември кренаа кампања од „папирологијата“ да се избрише терминот „госпоѓица“, оценувајќи дека со тоа се врши дискриминација над жените, затоа што се приморани да ја обелоденат својата брачна состојба.

Меѓутоа, Франција не нуди како опција неутрална скратеница како во Велика Британија (Ms), а од која не може да се насети брачната состојба на жената.

Мажите со овој проблем воопшто не се соочуваат, затоа што за нив е „резервиран“ терминот „господин“ (monsieur), без разлика дали се оженети или неоженети.