Еден норвешки пар го откажал венчавањето откако младоженецот брутално го претепал својот кум, откако го затекнал во кревет со невестата.

Младоженецот буквално полудел кога дошол дома и во креветот со својата свршеница го затекнал својот кум и најдобар пријател. Го зграпчил за вратот и го давел се додека овој не се онесвестил, а потоа го изудирал по главата.

Кога дошол при свест, кумот избегал од зградата. Иако на челото заработил 10 конци, одбил да го тужи младоженецот затоа што, како што рекол, си добил што си заслужил.

Но, и покрај неговото разбирање полицијата целиот случај го пријавила на обвинителството и младоженецот е обвинет за напад. Норвешкиот суд го осудил на 75 дена затвор, а на кумот му е изречена парична казна од 5.000 круни затоа што не се појавил на судот како сведок.

„Со оглед на тоа што невестата рече дека се што се случило е исклучиво нејзина вина и дека кумот не сакал младоженецот да биде казнет поради нападот, мислам дека казната е престрога“, рече адвокатот на младоженецот, Асбјорн Стокеланд. „Мојот клиент е разочаран, но не планира да се жали.“