24 годишната Рејчел Принц боледува од необично пореметување поради кое секогаш кога ќе се избања или ќе испие чаша вода доживува тешка алергиска реакција.

Алергијата на Рејчел е толку сериозна што и неколку капки плунка на нејзиното тело предизвикуваат силен осип, па додека вљубените парови ширум светот денеска го прославуваат Свети Валентин, таа својот свршеник не смее ни да го бакне. Затоа за разлика од многу други парови, тие Свети Валентин ќе го поминат држејќи се за раце, без бакнежи.

„Малку сум потиштена поради тоа што не можам да уживам во интимноста и близината со својот свршеник, но ако тој ме бакне, дури и во лицето, веднаш морам да се измијам за да не се појави осип“, вели Рејчел.

Рејчел, која боледува од така наречена аквагена уртикарија, не може да ги извршува и најобичните домашни работи затоа што не смее да дојде во допир со вода, па сите тие работи ги прави нејзиниот сакан свршеник Ли.

„Понекогаш ја гледам и посакувам да ја бакнам, но не смеам. Понекогаш ми е смачено од се. Ги извршувам повеќето домаќински работи, а не можам да добијам ни бакнеж во знак на благодарност. Но, не ми смета. Таа вреди за сето тоа“, вели Ли.

Рејчел првпат ја забележила оваа алергија на 12 години, а со годините станувало се полошо. „Се ме пече и чеша, се чувствувам како кожата да ми гори“, вели Рејчел за својата болест.

„Кога пијам вода, чувствувам како грлото ми се затвара, но кога пијам чај или овошен сок не е толку страшно, а не знам поради што, затоа што и во тоа има вода“, вели Рејчел.