Еден нарко-картел поставил плакати ширум централната мексиканска држава Гванахуато на кои со заканувачки тон ги известува соперничките банди дека ќе го одржува редот за време на посетата на папата Бенедикт XVI кон крајот на март.

Плакатите, со потпис на псевдорелигискиот нарко-картел „Витезите Темплари“, се појавиле непосредно по апелот на регионалната надбискупија до нарко-картелите да одржат примирје за време на посетата на римокатоличкиот поглавар.

„Сакаме Гванахуанто да биде мирен, затоа да не сте се осудиле да предизвикувате насилство за време на престојот на неговата Светост Бенедикт XVI. Сметајте се за предупредени“, можело да се прочита на плакатите на криминалната група, кои во меѓувреме, полицијата ги отстранила.

Кога го прашале за оваа порака, министерот за внатрешни работи Алехандро Поаре изјавил за новинарите дека „во Гванахуанто безбедноста ќе биде осигурана на основа на доминација на законите“.

Како што пренесува AFP, папата Бенедикт XVI ќе престојува во Мексико од 23 до 26 март, а во Гванахуанто ќе посети три града.