Американецот на овој необичен чекор се одлучил за да го измами судот.

Џон Гудман (48) пред законот ја посвоил својата девојка Хедер Хачинс (42), во случајот кој американскиот печат го нарекува „зона на самракот на правосудството“.

На Гудман моментално му се суди поради убиство од невнимание, затоа што предизвикал сообраќајна несреќа во која животот го изгубил Скот Вилсон (23).

Обвинетиот е основач на Меѓународниот поло клуб во Велингтон, Флорида, и има две биолошки деца кои се малолетни. Дел од своето богаство ставил во фонд до кој ќе имаат пристап дури кога ќе станат полнолетни, односно кога ќе наполнат 21 година.

Во случајот кој ја потресе јавноста, Гудман ја посвоил својата девојка Хедер, за и таа да добие пристап до тие средства и да може да ги искористи за финансирање на одбраната. Исто така, фондот за „децата“ не се наоѓа на неговиот имотен список кој би можел да биде распродаден за плаќање на отштета на семејството на жртвата.

Продолжението на судењето е закажано за 27 март.