Матичните клетки земени од папочната врвца на малиот Самуел би можеле да го спасат животот на неговиот тригодишен брат на кој му е дијагностицирана леукемија.

На тригодишниот Нејтан му е дијагностицирана акутна лимфобластна леукемија, и постои можност дека ќе му биде потребно пресадување на матични клетки доколку состојбата му се влоши. Матичните клетки земени од папочната врвца на помалиот брат на Нејтан, Самуел, се покажале компатибилни, и родителите, Мелани и Мајкл, се надеваат дека ќе помогнат во оздравувањето на нивното тригодишно момче.

„Кога ни рекоа дека Нејтан има леукемија, ми се скрши срцето“, рече Мелани. „Нему сега му е добро, но постои можност состојбата да му се влоши во иднина. Таа можност е малечка, но кога дознавме дека матичните клетки од папочната врвца на Самуел можат да помогнат, одлучивме тоа да го направиме без размислување“, вели 37 годишната мајка која покрај Нејтан и Самуел има уште две деца.

На Нејтан леукемијата му е дијагностицирана во 2010 година, откако неговата мајка забележала осип по неговите раце и нозе. Во болницата ги направиле сите потребни истражувања чии наоди укажувале на акутна лимфобластна леукемија. Состојбата на Нејтан се подобрува, но му остануваат уште 19 месеци хемотерапија во детската болница во Њукасл.