Ватикан призна дека ја користел интернет енциклопедијата Википедија за пишување на биографиите на 22 нови кардинали, кои папата Бенедикт XVI официјално ќе ги именува во февруари.

Како што пренесува BBC, биографиите се копирани од италијанската верзија на Википедија, која ја пишуваат корисниците. Во некои случаи, статиите за поединечни кардинали се препишани од збор до збор, а изворот не е наведен.

Новинарите го открија изворот на биографиите, а еден од главните трагови им бил податокот дека многу кардинали во биографиите се опишуваат како католици, пренесуваат медиумите.

Портпаролот на Ватикан, Федерико Ломбарди рекол дека неговите вработени не ги знаеле имињата на предложените кардинали однапред, па затоа работеле во брзаница.

Тој рекол дека прес службата сакала да им помогне на новинарите, на кои им било речено дека се работи за неофицијални биографии.

Папата имињата на новите кардинали ги објави на 6 јануари, а нивното прогласување е закажано за 18 февруари. Официјалните биографии на кардиналите во меѓувреме се поставени на официјалната интернет страница на Ватикан.