Издавачката куќа Portalibris објави нова авантура за познатиот детектив која ја напишал Ентони Хоровиц.

Во исто време кога во кината ни стигнува новото остварување на Гај Ричи „Шерлок Холмс: Игра на сенки“, во книжарницата се појави книга која нуди поинаков поглед на детективот од улицата Бејкер и неговиот верен сопатник.

Во книгата „Куќата од свила“, која е напишана осумдесет години по смртта на Артур Конан Дојл, британскиот писател Ентони Хоровиц ја раскажува приказната за Холмс од гледна точка на Вотсон.

Холмс е мртов, а Вотсон стар и сам по два брака, три деца и седум внуци. Тој се присетува на една негова и на Шерлок авантура, случај толку мистериозен и шокантен што своите белешки за тој случај ги заклучил во сефот на 100 години.

Лондон, 1890 година. Трговецот со уметнички дела, Едмунд Карстерс ги моли Холмс и Вотсон за помош. Детективот и докторот се вовлечени во меѓународна завера. Мистериозната фраза „куќата на свилата“ го поврзува врвот на власта со подземниот свет на криминалот, и Холмс се плаши дека наишол на завера која ќе го уништи општеството.

Хоровиц е британски книжевник и сценарист, кого Здружението Артур Конан Дојл го избрал за да го напише новиот роман за Шерлок Холмс. Познат е и по серијалот романи со Алекс Рајдер, но и сценаријата за британските крими-серии „Херкул Поаро“, „Убиствата во Мидсамер“ и „Војната на Фојл“.