Огромна бомба од Втората светска војна, пронајдена минатата недела во германскиот град Кобленц, вчера беше успешно деактивирана откако од градот беа евакуирани половина од жителите.

Портпаролот на пожарникарната служба на Кобленц, Бајко Брајтбарт рече дека жителите на градот ќе останат евакуирани додека другата граната пронајдена во близина не биде деактивирана со контролирана експлозија.

Поради планот на демонтирање, од Кобленц се евакуирани околу 45.000 жители кои живеат во круг од 2 километри од местото каде што бомбата е пронајдена, што е една од најголемите евакуации на германски жители во врска со заостанати бомби откако во 1945 година се заврши Втората светска војна.

За време на демонтирањето биле ангажирани 2.500 полицајци, пожарникари и медицински службеници.

Бомбата е од британско производство, тешка е речиси два тона и минатата недела е пронајдена веднаш покрај американска бомба, тешка 125 килограми, што се случило затоа што нивото на водата на Рајна исклучително опаднало поради долготрајната суша.

Меѓутоа, и шест и пол децении по Втората светска војна, се уште е вообичаено во Германија да се најдат неексплодирани сојузнички бомби.