Една од водечките руски телевизиски станици, REN TV, ја отпушти својата водителка Татјана Лиманова, која ги запрепасти гледачите затоа што подигна среден прст додека го читаше името на американскиот претседател Барак Обама.
Инцидентот се случил на 14 ноември, за време на попладневните вести кои ги водела Лиманова, добитничка на престижната руска телевизиска награда TEFI.
Лиманова читала преглед на вестите за самитот на лидери на Организацијата за соработка на земјите од азиско-пацифичкиот регион (APEC), кој е одржан на Хаваите.
„Димитриј Медведев денеска го презеде претседавањето на APEC, а таа функција порано ја извршувал американскиот претседател Барак Обама“, рече таа по што го подигна средниот прст на левата рака кон камерата.
Извор близок на телевизиската станица тврди дека Лиманова добила отказ уште истиот ден кога се случил инцидентот. Веста за нејзиното отпуштање потврдена е откако за ова известиле бројни руски медиуми.
Во објаснувањето на оваа телевизиска станица се наведува дека водителката им гестикулирала на своите колеги зад камерата и дека не знаела дека уште е во програма.
