Француската полиција во рамки на акциите за уништување на нелегалните улични продажби, запленила 270 тони минијатурни Ајфелови кулички и уапсила четири личности.

Полицијата оваа година си дала задача сама на себе да ги исчисти улицте на Париз, градот со најголем број на туристички посети, од илегални продавачи на сувенири.

Портпаролот на паришката полиција изјавил дека во последната рација уапсени се четири кинески државјани кои снабдувале со шверцувана роба 100 илегални улични продавачи.

За време на претресот на едно складиште, полицијата пронашла 300 тони роба, вклучувајќи и 270 тони мини Ајфелови кулички. Целата роба била увезена од Кина.

„Цел на операцијата не е само борба против илегалната улична трговија, туку и разоткривање на набавната мрежа“, рече извор од полицијата.

Илегалната улична продажба во Франција се казнува со затвор во должина до шест месеци и парична казна во износ од 3.750 евра.

Во периодот од март до септември, во Париз се приведени околу 4.000 илегални улични продавачи од кои 1.200 се задржани во затвор.