Невообичаен, но исклучително романтичен настан се одиграл во вторник на сплитскиот аеродром кога 23 годишен дечко од Сплит, очигледно многу заљубен, одлучил на својата девојка да и приреди оригинален „пречек за изненадување“...

Имено, Томислав Б. околу 13 часот ја прескокнал заштитната ограда на аеродромот висока два метри и се сокрил.

Од Загреб со авионот Croatia Airlines во Сплит допатувала неговата девојка Маја К. Кога авионот слетал и патниците од него почнале да излегуваат, Томислав потрчал кон Маја со букет цвеќе.

Настанала паника. Го застанале полицајци и го одвеле во полициска станица.

Освен букетот цвеќе, кај „храбриот“ Томислав не пронашле ништо друго што би можело да го загрози непопреченото одвивање на авионски сообраќај или сигурноста на патниците.

Романтичниот Томислав сепак заработил пријава за прекршок на основа на Законот за надзор на државните граници.