Момче, без лични документи, меѓу 16 и 18 години, кое зборува англиски и малку германски, дошло во берлинската полиција, тврдејќи дека пет години планинарел со татко му...

Како што тврди тој, неодамна го нашол татко му мртов и го закопал во една дупка, пишува германскиот таблоид Билд, а потврди и полицијата.

Мистериозното момче, со вреќа за спиење, шатор и компас, вели дека се вика Реј и дека пред две недели го нашол татко си мртов во шумата и го закопал, а потоа, според тоа што татко му некогаш му го зборувал, почнал да се движи кон север и стигнал во Берлин.

Медиумите наведуваат дека момчето кажало дека мајка му умрела пред пет години во сообраќајна несреќа.

Полицијата нема одговор на прашањето од која земја доаѓа момчето и дали живеело во шумата само во Германија или и во некоја друга земја, додека Интерпол проверува дали момчето е пријавено како исчезната личност и дали некаде е пронајден машки труп во шумата.