Контроверзниот закон за додатниот данок на прехрамбени производи кои во својот состав имаат поголема количина на шеќер и сол од вчера влезе во сила во Унгарија...

Поентата на новиот закон, во унгарската јавност познат како „данок на чипс“, е промена на навиките во начинот на исхрана на унгарците кои поради внесување на преголеми количини на слатки работи и грицки имаат се повеќе проблем со дебелината и дијабетисот.

Конзервативната влада на премиерот Виктор Орбан, покрај обидот да воведе поправилна исхрана кај граѓаните, со новиот данок ќе собере додатни 74 милиони евра годишно во буџетот.

Додатниот данок првенствено ќе се наплаќа на кекс, грицки, енергетски пијалоци и други калорични производи.

Во унгарската јавност се проценува дека законот сепак нема на вистински начин да одговори на поентата затоа што данокот нема да се наплаќа на традиционална храна: колбаси, салами, сланина и други сувомеснати производи.

Новиот данок има и своја негативна страна, затоа што би можел да доведе до потрес во функционалната економија.

Германската компанија чиј сопственик е Чиос Чипс соопшти дека поради новиот данок одлучила дека сепак нема да отвори нов производен погон во Унгарија.

Медиумите во Унгарија пишуваат дека германската компанија можеби нема да биде единствената која ќе се откаже од произведување во таа земја. Според нив, произведувачот на енергетскиот пијалок Hell исто така планира да го стори тоа.