Неодамнешните анализи покажале дека социјалната мрежа Google+, која направи рекорд по брзината на растот на корисниците, има дури 83% неактивни корисници...

Кога во почетокот на август беа објавени статистичките податоци за тоа дека социјалната мрежа Google+ веќе има 25 милиони корисници, се зборуваше за нов конкурент на Facebook, како и за нов рекорд во брзината на растењето на мрежата.

Компанијата comScore соопшти дека Google+ растел 20 пати побрзо отколку останатите социјални мрежи. На пример, MySpace тој број на корисници го достигна за 20 месеци, а кај Facebook тоа траеше дури 36 месеци.

Меѓутоа, во време кога поимот социјална мрежа веќе на сите им е познат, реалноста на мрежата Google+ доби сосема поинаков пресврт.

Анализата на порталот bimeanalytics.com покажа дека дури 83% од корисниците се неактивни. Тоа значи дека се регистрирале на мрежата од љубопитност, виделе што се нуди и од тогаш никогаш повеќе не се логирале.

Покрај тоа, од 21 јули, кривата која ја покажува динамиката на растот значително забави. За време на август, според анализата, главно се променил бројот на жени на Google+. Тој пораснал за 2%, па сега има 30% припаднички на поубавиот пол.

Додека во јули, најбројната група беа инженерите и програмерите, во август врвот на скалата го презедоа студентите и софтверските инженери. ТИе заедно прават околу четвртина милиони корисници. Во таа голема група спаѓаат и дизајнерите и наставниците.

Анализата покажа и во кои фирми работат корисниците на социјалната мрежа Google+. Најмногу ги има, како што можеше да се очекува, од Google, па следуваат работниците од фирмите IBM, Infosys, Accenture, Apple и HP.