Еден јужноафриканец се разбудил во мртовечницата речиси еден ден откако семејството соопштило дека починал, соопштија службеници од здравството...

Портпаролот на министерството за здравство, Сизве Купело, изјави дека мажот се разбудил во недела попладне, 21 час откако неговото семејство, по нападот на астма што го доживал, ја повикала погребната служба која констатирала смрт и телото го префрлила во мртовечница.

Сопственикот на мртовечницата, Ајанда Маколо, изјавил дека пратил возачи да го соберат телото, малку откако семејството ја пријавило смртта и дека „починатиот“ имал околу 80 години.

„Кога стигнал таму, возачот го прегледал телото, го проверил пулсот, побарал срцев ритам, но ништо немало“, рече Маколо за една америчка агенција.

Меѓутоа, речиси по еден ден откако телото било сместено во заклучен оддел со ладење, вработените во мртовечницата слушнале некој како вика на помош.

Мислеле дека станува збор за дух, рече сопственикот на мртовечницата.

„Не можев да верувам! И јас се исплашив. Но, тие се мои вработени и морав да им покажам дека не се плашам, па ја повикав полицијата“, рече Маколо.

Откако полицијата дошла, групата со него влегла во мртовечницата.

Маколо рече дека постариот маж бил блед кога извлекле и дека прво прашал: „Како се најдов овде?“

Министерството за здравство соопштило дека тој е префрлен во блиската олница на набљудување и подоцна пуштен, откако докторите утврдиле дека здравствената состојба му е стабилна.

Купело апелирал на јужноафриканците да ги повикаат здравствените служби кои би потврдиле дека нивните најблиски навистина се починати.

Семејството е известено дека нивниот најблисок е жив за време на семеен состанок на кој бирале цветни аранжамани за погребот.

Многу се среќни што се врати дома, рече Маколо.