Полицијата која ја истражува смртта на британската пејачка соопшти дека во куќата на Ејми Вајнхаус не се пронајдени траги од наркотици. Вечерта пред да почине, пејачката била прегледна од тим лекари...

Нови детали од полицијската истрага по повод смртта на младата британска пејачка покажуваат дека Ејми Вајнхаус била мртва неколку часа пред анонимната женска личност, најверојатно нејзината соседка, да ја викне брзата помош, како и тоа дека во нејзиниот стан не се пронајдени никакви наркотици.

Ејми Вајнхаус последен пат разговарала со своето обезбедување во десет часот наутро, во саботата, а шест часа подоцна е пронајдена мртва. Лекарите од брзата помош велат дека, кога дошле во нејзината куќа во Камден, била мртва веќе „неколку часа“.

Полицијата на лице место не пронашла никакви наркотици, но дошла до сознание дека во петок навечер пејачката ја посетил тим од лекари од блиската клиника, кој детално ја прегледал и рекол дека „се е во ред“.

„Здравјето на Ејми беше сериозно нарушено и често одеше на прегледи или лекари одеа кај неа дома да ја прегледаат“, рече неименуан извор за The Sun. „Долгогодишното конзумирање на дрога и алкохол ја оставија многу кревка и често имаше проблеми со белите дробови“, додава изворот и вели дека „лекарот таа вечер бил задоволен со нејзината здравствена состојба“.

Поминале само неколку часа пред да биде пронајдена мртва во сабота попладне. Семејството на Ејми тврди дека приказната која ја објавиле медиумите, дека умрела од коктел дроги, е целосна бесмислица.

„Наводите дека купила кокаин, кетамин и екстази се потполна бесмислица“, пишува во соопштението на семејството Вајнхаус. „Ние ја изгубивме нашата Ејми, прекрасна ќерка, сестра, роднина...“

Причината за смртта ќе биде позната по обдукцијата и токсиколошките анализи.