Астрономите веруваат дека во нашето соседство пронашле ѕвезда стара 13,2 милијарди години, малку помлада од Големиот Бенг.

Астрономите веруваат дека во соседството на нашиот Сончев систем откриле вистински метузалем - ѕвезда која е стара најмалку 13,2 милијарди години, што значи дека се формирала непосредно по Големиот Бенг.

„Мислиме дека оваа ѕвезда е најстара за која знаеме“, кажа Хауард Бонд од Универзитетот во Пенсилванија, кој оваа вест ја обелоденил на 10 јануари во рамки на Американското астрономско друштво во Калифорнија.

Според пишувањето на списанието „Природа“, старата ѕвезда, наречена HD 140283, се наоѓа релативно близу, на „само“ 186 светлосни години од нашиот Сончев систем.

Астрономите веќе подолго време знаат за оваа ѕвезда како и за тоа дека речиси во целост е составена од водород и хелиум, доказ дека настанала на самиот почеток на вселената. Меѓутоа, никој досега не знаеше колку таа всушност е стара.

Користејќи ги податоците кои меѓу 2003 и 2011 ги собрал телескопот Хабл, истражувачите објавија нови, попрецезни мерења и пресметале дека HD 140283 стара 13,9 години, плус минус 700 милиони години.

Староста на ѕвездата изнесува, значи, најмалку 13,2 милијарди години, додека самиот универзум е стар 13,77 милијарди години.