Венера, Земјата и Сонцето во иста линија. Ова ќе се повтори дури за 105 години...

Ретката астрономска појава кога Венера поминува преку Сончевиот диск ќе може да се види и во Македонија – утре наутро, еден час по изгрејсонце.

При вселенскиот танц, познат како транзит на Венера, кога Земјата, Венера и Сонцето ќе бидат во иста линија ќе биде видлива само мала црна точка.

Поради големата оддалеченост, црниот диск на Венера патува многу бавно, па неговото поминување преку дискот на Сонцето може да трае со часови.

Минувањето на Венера од едниот до другиот раб на Сончевиот диск трае различно и зависи од кое место на Земјата го набљудувате.

Научниците и овојпат предупредуваат на опасноста од гледањето во Сонцето без соодветна заштита. Доколку со голо око гледате во сјајниот Сончев диск може да дојде и до трајно оштетување на видот.

Минувањето од 5-ти до 6-ти јуни целосно ќе може да се набљудува од Океанија, североисточните делови на Русија и од Алјаска. Следната ваква појава се очекува во 2117 и 2125 година.