Кинеските научници веруваат дека пронашле посмртни остатоци од досега непознат човечки вид кој на земјата живеел пред околу 15.000 години.

Научниците објавиле дека почнале со анализа на остатоците од најмалку пет индивидуи кои засега ги нарекле „луѓето од пештерата на Црвениот Елен“, бидејќи остатоците се пронајдени на локација во близина на таа пештера. Во статија за научното списание PLoS One додале дека е потребно да се спроведат дополнителни истражувања за да се утврди дали навстина се работи за досега непознат човечки вид.

Коските, черепите и забите се пронајдени уште во 1989 година, но досега не биле подетално испитани. Според првите анализи, луѓето од пештерата на Црвениот Елен имале кратки и плоснати лица, широки носеви, а предниот дел од мозокот им бил прилично сличен на оној кај современиот човек.

„Откривме нова популација предисториски луѓе кои се анатомски единствени меѓу сите припадници на човечкото еволуциско стебло“, објасни австралискиот научник Дерен Курноу.

Научниците предупредуваат на внимание затоа што не сакаат да брзаат со заклучоците. Како точно овој „новооткриен вид“ се вклопува во процесот на еволуција на човекот се уште не е познато, но научниците се надеваат дека со понатамошни анализи ќе дојдат до одговор на тоа прашање.