Астероид со големина на носач на авион, поминал синоќа покрај Земјата што е најблиската средба на една таква вселенска карпа со нашата планета после повеќе од 3 децении...

Научниците ја исклучија можноста за судар, но ги свртеле телескопите кон небото за да дознаат повеќе за објектот познат како 2005 YU55.

Астероидот бил најблиску до земјата 28 минути по полноќ по средноевропско време, на оддалеченост од 325.088 километри, поблиску од просечната оддалеченост меѓу Земјата и Месечината која изнесува 383.633 километри.

Минатиот пат астероид со оваа големина дошол толку блиску до Земјата во 1976 година, а тоа дури повторно ќе се повтори во 2028 година.

Научниците од мрежата на длабоката вселена во американската вселенска агенција НАСА во калифорниската пустина цела недела го следеле астероидот со пречник од 400 метри кој се приближувал кон земјата со брзина од 46,671 километар на час.

Астрономите, како и аматерите, љубителите на универзумот, сите внимателно го следеле.

За оние без телескоп, опсерваторијата емитувала снимка во живо од поминување на астероидот.