Хирурзите од универзитетската болница Акдениз во Турција, ја извршиле првата успешна трансплатација на матка. Така Дерја Серт стана првата жена на светот на која успешно ѝ е пресадена матка од почината донаторка, со што ја поттикна надежта на милиони жени дека и тие можат да родат дете...

„Среќа, возбуда, сите чувства се помешани“, изјави Серт (21) која е родена без матка, како секоја 5.000 жена во светот.

„Ако Бог дозволи, наскоро ќе го држиме нашето бебе во рацете“, рече младата пациентка на која пресадената матка и сраснала со телото.

Ова е втор обид за трансплатација на матка во светот. Првиот обид е направен во 2000 година во Саудиска Арабија, но се завршило со отфрлање на органот по 99 дена.

Турските хирурзи наведуваат дека иако операцијата сама по себе била успешна, вистинскиот успех ќе биде постигнат дури кога Серт ќе роди бебе.

По најмалку шест месеци, на младата пациентка ќе ѝ бидат имплантирани ембриони кои се произведени пред операцијата.

Откако Серт ќе се породи, хирурзите планираат да ѝ ја извадат пресадената матка за да се избегне можен ризик од отфрлање и инфекција.

„Се разбира, одлуката останува на пациентката, но ние сме на мислење дека треба да се отстрани“, рече Омер Озкан, еден од осумте хирурзи кои ја изведоа операцијата.

Само три медицински центри во светот работат на трансплатација на матка. Другите два се наоѓаат во Шведска и во САД.