Група микробиолози од љубљанскиот научен институт „Јожеф Штефан“ претставија метод на внесување лекови во органите зафатени од рак преку магнетизирани липозоми, што би можело да внесе револуција во лечење на болните од рак и да ја зголеми ефикасноста на хемотерапијата, објавија словенските медиуми...

Словенското министерство за наука и технологија објави во соопштението за јавност дека истражувањето, кое го водела група словенски научници во соработка со научниците од Русија и САД, е објавено во престижното научничко списание Nature Nanotechnology.

Шефот на словенскиот дел од тимот, др. Борис Туерк, појасни за словенската телевизија и комерцијална телевизиска станица POP-TV, дека станува збор за метод со кој во организмот лековите за уништување на канцерогените клетки се внесуваат усмерено, преку липозоми (микрочестички чиј состав е сличен на составот на клеточната мембрана) во која е внесен „магнетен елемент“.

Таквиот магнетизиран липозом, кој содржи медицинска супстанца, со надворешен магнет се доведува точно до органот зафатен од рак. Затоа нема опасност лекот да делува штетно на здравиот дел од организмот, а потребна е и помала количина од супстанцата која се користи за хемотерапија. Словенските медиуми наведуваат дека новиот метод, кој би можел да внесе револуција во лечењето на рак со хемотерапија, веќе е испробан на експериментални глувчиња и се покажал како многу ефикасен.

За понатамошни истражувања ќе бидат потребни 20-30 милиони евра, а се планира средствата да бидат обезбедени од САД. Методот во тој случај би можел да биде усовршен и испитан на луѓе и ако се покаже дека нема отровни ефекти, до негова примена во хуманата медицина би можело да дојде од прилика за пет-шест години, објавија словенските медиуми.