Нашата планета има приближно 8,7 милиони живи видови, од кои 6,5 милиони се развиваат на цврсто тло, а 2,2 милиони во водено поднебје, според досега најпрецизната проценка објавена во вторник во САД...

Од тие 8,7 милиони видови, само 1,23 милиони (14,1%) досега се откриени, попишани и каталогизирани, истакнуваат истражувачите од глобалната мрежа „Попис на морскиот живот“, автори на трудови објавени во американското научничко списание PloS Biology.

Нивната проценка се темели на најновите техники на таксономија, и овозможува попрецизно одредување на бројот на видови за разлика од претходните во кои се зборуваше за од три до сто милиони видови.

Поголемиот дел од 8,7 милиони видови се животни - 7,77 милиони, од кои се каталогизирани 953,434 видови. Следувааат габите со 0,61 милион видови, растенијата со 0,3 милиони, група едноклеточни организми со 0,04 милиони и алги и други организми со 0,03 милиони видови. Бактериите и други групи микроорганизми не се вклучени во тие бројки.

„Прашањето колку живи видови постојат на Земјата ги интересираше научниците со векови, а одговорот е посебно важен затоа што човечките активности и нивното влијание го забрзуваат исчеснувањето на некои видови“, објаснува Камило Мора од Хавајскиот универзитет и универзитетот Далхаузи во Халифакс, главен автор на студијата.

Според неговите зборови, „бројни видови би можеле да исчезнат пред да дознаеме за нивното постоење, единствена задача во екосистемот и потенцијален допринос за подобрување на благосостојбата на луѓето“.