Нов Исус Христос, нова Марија Магдалена, нов Јуда, нова контроверзија...

Долгоочекуваното видео на Лејди Гага конечно пристигна и навистина католичката црква имала право кога го апелираше до христијаните да не го гледаат уште пред неговото излегување.

Во денешно време се почесто се обновуваат и модернизираат старите приказни или добро познатите класици, па, Гага помислила, зошто да не приказна од Библијата?

Користејќи сцени, ликови и ситуации од Новиот Завет, Лејди Гага ги поместува границите на нормалното и прифатливото на едно повисоко (дури и за неа) ниво.

Во новиот спот за контроверзната песна Judas, можеме да ја видиме Гага во улога на Марија Магдалена, проститутка која откако Исус ќе и ги прости гревовите, ќе му стане верна следбеничка.

Исто така можеме да го видиме модерниот Исус Христос, кој е следен од неговите 12 апостоли (меѓу кои е и Јуда) на моторни возила како некоја улична банда.

Можеме да го видиме Исус како оди наоколу и ги благословува луѓето и им ги простува гревовите, а Марија му е верна придружничка и го следи секој негов чекор, но нејзиното срце гори по Јуда.

На крајот од видеото, можеме да видиме дека Гага си зела за слобода да ја смени приказната (та нели ја сменија и Црвенкапа), па Марија умира откако ќе ја каменуваат, иако во оригиналната приказна во Новиот Завет не е тоа случајот.

Во секој случај, видеото само што излезе, а едно е сигурно: дефинитивно ќе го преплават критики до крајот на утрешниот ден.

Како и да е, уживајте во новото ремек-дело на секогаш контроверзната Лејди Гага!