Поп кралицата Madonna, своевремено обвинувана од Ватикан за изведување на еден од најсатанските концерти во историјата, ги изненади фановите на концертот во Рим посветувајќи ја “Like a Virgin” на поглаварот на римо-католичката црква. Пред 60.000 фанови на концерот кој се одржа во италијанската престолнина во саботата, таа изјави: “Му ја посветувам оваа песна на папата, бидејќи сум дете на Бога. Сите вие сте божји деца.“

Италијанските медиуми оваа посвета ја оценија како провокација. Весникот Corriere della Sera на насловната страница напиша: “На својот концерт во Рим, Madonna не ја пропушти приликата да провоцира“.

Madonna, родена во италијанско католичко семејство, неколку пати во својата кариера наиде на критики од страна на католичката црква. Во 2006 година точката со распетието во рамките на нејзината турнеја беше оценета како богохулие од страна на Ватикан. Црквата го осуди и нејзиниот контроверзен спот за "Like a Prayer” во 1989 година, во кој беа прикажани запалени крстови, статуи од кои тече крв и Madonna како заведува црномурест Исус. Ватикан ја критикуваше нејзината турнеја “Confessions On The Dance Floor” турнеја со прикази на распетието како една од најсатанските изведби во историјата на човештвото”.