Таткото на пејачката е одлучен во намерата да издаде уште еден нејзин албум, речиси две години по смртта на Ејми.

Мич Вајнхаус за Daily Mail кажа дека во подготовка е уште еден албум од Ејми Вајнхаус, која почина летото 2011 година од труење со алкохол.

„Имаме многу песни, и најголемиот дел од нив ги има снимено уште како дете, кога само што почнуваше да пее. Преговараме со луѓето кои ги продуцираа тие песни, за да можеме да ги објавиме“, рече Мич.

По смртта на Ејми, објавен е постхумниот албум Lioness: Hidden Treasures. Мич кажа дека планира целиот приход од нејзиниот албум да го проследи на фондацијата која го носи името на Ејми, а која им помага на тинејџерите кои се борат со болести на зависност.