Поранешната пејачка на легендарната шведска поп четворка, Агнета Фелтског, во мај ќе издаде нов студиски албум.

Албумот A ќе биде издаден на 13 мај, а на него ќе се најде и првата песна која Агнета (62) ја напишала во последните неколку децении, како и песната која изведува во дуето со Гери Барлоу, лидерот на британската група Take That.

Пејачката веќе го објави и првиот сингл When You Really Loved Someone, за кој сними и спот. „Мислев дека никогаш повеќе нема да пејам, но кога ги слушнав првите три песни, не можев да одолеам.“

Агнета Фелтског на снимањето на албумот соработувала со шведскиот текстописец и продуцент Јерген Елофсон, кој е „виновен“ за многубројните хитови на Бритни Спирс, Кели Кларксон, Селин Дион...

ABBA е еден од најпопуларните поп бендови на сите времиња, основан е во 1970 година, а се прослави во 1974 година со победата на Евровизија со песната Waterloo.

По распаѓањето на групата во 1982, Агнета Фелтског издаде три соло албуми на англиски јазик, а последниот My Colouring Book го објави во 2004 година.