Убава, талентирана, млада, шармантна и се останато по ред... која е Реј Морис?

Реј Морис е името на 18 годишната британска пејачка која се заканува да ја завладее музичката сцена со својот неверојатен глас, природна убавина и шарм на кој сите паѓаат.

Иако има објавено само неколку песни, а моментално работи на својот прв албум, материјалот кој Реј го произведува е исклучителен и може наскоро да ги засени поп сензациите како Адел и Џастин Бибер.

Нејзиниот прв диск, на кој беа вклучени само три песни, веќе е распродаден, таа тргна на својата прва мала турнеја низ Британија, а доколку сакате да ја добиете компилацијата Blueprint Demos во која се вклучени три демо песни, се што треба да направите е да се регистрирате на нејзината веб страница и ќе го добиете линкот за преземање.

Реј сите ги воодушеви со својата изведба во живо на песната Don't Go, која се најде и на официјалниот саундтрак на шестата сезона од многупопуларната серија Skins, а својот најнов сингл насловен како Grow го објави пред само неколку дена.

Убава, талентирана, млада, шармантна и освежувачка, Реј Морис може да биде следното големо нешто на музичката сцена. Слушнете ја и вие.