Таа е само уште една во низата славни личности кои се занимаваат и со мода. Вдовицата на Курт Кобејн својата прва колекција симпатично ја нарече Never The Bride.

Музичката кариера баш не и „цвета“, пишувањето го остави на страна, сликарството веќе го усоврши, а сега Кортни Лав одлучи старите крпички кои со години и се „врткале“ по орманите, да ги редизајнира и од нив да направи шик колекција за дами кои не им робуваат на трендовите и модната „диктатура“.

Се разбира дека девојките кои ќе посакат парче од гардеробата со потпис на контроверзната Кортни мораат да бидат малку и „безобразни“ затоа што некои модели, кои пејачката ги покажа на Twitter, повеќе откриваат околку што покриваат.

Колекцијата неодоливо потсетува на костимите од кабареата, но и борделите од крајот на осумнаесетти век и тогашните дами со „слободен дух“.

Од материјали користела речиси се, но сепак чипката и монистите се најзастапени, а дизајнерката вели дека нејзината колекција им е наменета на младите дами. Венчални фустани, се разбира, нема во нејзината колекција.