Ќерката на познатиот Пол Мекартни од Beatles ги дизајнираше униформите за британскиот олимписки тим. Стела Мекартни вели дека била инспирирана од знамето на својата земја.

Модната дизајнерка и креативната директорка на Adidas веќе неколку години создава креативни спортски модели, а сега ги облече и олимпијците.

Тимот на Обединетото Кралство, кои својата земја ќе ја претставуваат на Олимписките игри во Лондон (од 27 јули до 12 август), ќе носат униформи со потписот на Стела Мекартни.

На промотивната ревија во Лондонската Кула, на модната писта, меѓу другите, шетаа и светската шампионка во седмобој, Џесика Енис и веслачот, носител на олимписко злато, Пит Рид.

„Сакав да го модернизирам дизајнот на познатото знаме, да го претставам на современ начин. Се надевам дека спортистите ќе ги сакаат униформите кои ги дизајнирав, а кои ќе ги носат не само за време на натпреварувањето, туку и на тренинзите, за време на одморот и за време на доделувањето на наградите“, кажала ќерката на Пол Мекартни.