Иако секој ден барем еден ангел на Викторија ги „раширува крилата“ во медиумите, најпопуларна манеканка на светот е Кејт Мос.

Интернет порталот PeekYou состави листа на најпопуларни манекенки на светот користејќи се со „научен метод“ - броење на вестите објавени за одредена манекенка, насловни страници од списанија со нејзиниот лик и нејзината интеракција со фановите преку социјалните мрежи. Потоа е добиен резултатот на нивниото значење и популарност.

За некои ова е интересен и, секако, поинаков начин на рангирање на манекенките. Освен по совршеното тело и „количината на облека“ која ќе ја соблечат за снимање на некој едиторијал, манекенките можат да се рангираат и по застапеноста во медиумите.

На прво место на листата се најде Кејт Мос. Иако „кај нас“ во последните дванаесет месеци се објавени само неколку вести за неа, останатите светски медиуми „не ја испуштале од устата“. Благодарение на новинарите, Мос е на првото место на листата.

Второто место и припадна на Хајди Клум, мајка на четири деца, а третото на еден од ангелите на Викторија, Адријана Лима.

Во првите пет се нашле уште и Жизел Бундшен и Алесандра Амбросио, а во првите десет и Кендис Свинпул, Лара Стоунт, Наталија Водијанова, Каролин Марфи и Дарија Вербова.