Модната недела во Милано се одржува од 21 до 28 септември, а првата вечер прикажана е, помеѓу другото, и колекцијата на модната куќа Gucci, со која истовремено се обележани 90 години од постоење на тој бренд...

За ревијата на модната куќа Gucci секогаш се бараат неколку карти повеќе, а уште кога се прикажува јубилејна колекција по повод 90 години работа, тогаш тоа е настан на сезоната.

Така на модната недела во Милано е прикажана Gucci колекцијата за пролет/лето 2012, а истовремено е отворена и нова продавница во Виа Монтенаполеоне, миланска улица добро позната за светските купохоличарки, но и Gucci музеј во Фиренца. И тоа не е се. Се славеше и во Париз на журка која исто така е организирана по повод јубилејот на познатата италијанска модна куќа.

Прикажаната колекција е инспирирана од двесетите години на минатиот век: фустани кои ја истакнуваат силуетата, женствени панталони од лесни материјали, јакни со остри линии кои потсетуваат на војнички, фустани до колена и друго.

Се на модната писта во Милано беше црно, бело, златно и смарагдно, а гламурот толку специфичен за Gucci е постигнат и со лесното одење на манекенките кои личеа на извајани статуи.

Модните критичари истакнуваат дека оваа колекција има нота на сексуална еманципација која некогаш одамна ја поставил поранешниот Gucci дизајнер, Том Форд. Тој од жените направил „сексуална грабливка со стил“.