Креациите на либанскиот дизајнер Ели Сааб се меѓу најпосакуваните на црвениот тепих. Секоја жена станува принцеза во неговите бајковити и етерични креации, исполнети со блескава женственост и прозрачност својствена на сончевите зраци. Таа модна есенција во мирисни капки ја пренесе и неговиот прв парфем наречен едноставно Le Parfum...

Својата прва модна ревија осумнаесет годишниот Ели Сааб ја финансирал сам и таа свеченост на мода и нежна женственост и му ја подари на својот роден град Бејрут.

Од тогаш до денеска тој стана синоним на висока мода и почитувач на женската аура, прозрачна и светкава каква што имаат само принцезите во бајките или вистинските жени во своите модни сонови.

Тоа го постигна благодарение на врвната вештина за драпирање и деликатните рачни везови на прозрачни и деликатни материјали, и бои до најсофистицирани нијанси.

Некои од најизбирачките жени во светот, од принцези до познати личности на црвениот тепих, се верни на неговото име кое гарантира елеганција, лесно прифатлива и за љубителките на едноставноста, како и на оние кои се вечно жедни за блескавост.

Неговиот прв парфем едноставно наречен Le Parfum го осмисли познатиот нос на Франсис Каркдиџан чија задача беше во стаклено шишенце да го преточи волшебниот свет на Ели Сааб.

„Во соработката со Ели Сааб најмногу ме фасцинираше настојувањето на мирисната интерпретација на светлината. Немав посебна слика во главата, туку само чувства: белината на сонцето во својата зеница, женственоста која зрачи и модерната интепретација на физички раскош“, појасни Каркдиџан.

За постигнување на таков парфем му помогнале цветовите на портокал за горната нота, а опојниот јасмин во самото срце на парфемот. А базата на овој сензуален цветен букет ја сочинуваат кедар, пачули и нота на мед од рози.