Судот во Лагос прекинал брак на Нигериецот Олуфаде Адекоја (57), затоа што се жалел од сопругата, која со години доцнела со подготовка на вечерата...



Адекоја бил при крај на нерви кога Олусола, жена му со која поминал 25 години во брак, одбила да му ја послужи вечерата точно на време:

„Мојата жена не ги исполнува брачните должности. Не ми подготвува да јадам навреме, а јас ја предупредив неколку пати. Таа едноставно не сака да ме слуша. Не ја гледам причината да чувам жена што ме изгладнува. Доста ми е од се“, изјавил Адекоја пред судот.

Неговата сопруга ги отфрлила сите обвиненија, тврдејќи дека сето тоа го измислил за да се ожени со друга жена. Судијата Олу Адебији сепак донел одлука за развод: „Судот во повеќе наврати се обидуваше да ги помири нивните разлики, но сите напори не дадоа никакви резултати“.

Се верува дека ова е прв брак разведен поради доцнење на вечерата, иако Нигеријците се познати по чудните причини за развод. Во 2005 година проповедник бил приморан да се разведе од 82 жени, со цел да биде во согласност со исламскиот закон, кој пропишува дека мажот смее да има најмногу 4 жени.