Повторно е пред нас - за некои еден од омилените празници, за некој куп глупости кои продавниците ги тераат луѓето да ги трошат и онака малкуте пари кои ги имаат. Св.Валентин од празник кој промовира романтика стана празник кој често иритира, а иако формата се промени, поентата остана иста. Наместо да го чекате тој ден, зошто да не го имате тоа чувство секој ден, во текот на целата година...

Оставајте си пораки
Не на мобилниот, туку низ домот. Сокријте ливче со симаптична порака во фрижидер, па нека ја пронајде кога ќе отвори. Ќе се изненади, а вие ќе се изненадите ако во меѓувреме сте заборавиле на неа. Само немојте да оставате пораки кај средствата за чистење, бидејќи би можело да се начекате додека ја пронајде.

Заменете го сексот со разговор
Не секоја ноќ, и не пречесто, не промовираме апстиненција. Но понекогаш, останете во кревет, прегрнати, и зборувајте како ликови од романтичните филмови кои поминуваат цела ноќ во разговор. Секогаш можете да дознаете нешто што не сте знаеле.

Правете си услуги
Некогаш земете нешто што знаете дека тој мора да го направи а навистина му е тешко, и направете го тоа за него. Тој ќе го цени тоа, веројатно и ќе ви возврати, а двајцата ќе имате чувство на взаемно почитување.

Бидете романтични
Напишете му песна, пратете му фотографија додека е на работа, однесувајте се онака како што би се однесувала некоја жена во романтична комедија ако немате инспирација. Повеќето од нас зборуваат против таквите слатки гестови, но сепак повеќето потајно ги посакуваат.