Жените сакаат помалку секс со напредувањето на годините, но сакаат тој да биде задоволителен, пишува весникот Дејли експрес, повикувајќи се на резултатите од американско истражување, кое вклучило 806 учеснички на просечна возраст од 67 години...

И во подоцнежните години од животот љубовта останува важна за постигнување на сексуално задоволство, забележуваат авторите на истражувањето од Калифорнискиот универзитет во Сан Диего.

Резултатите од анкетата покажуваат дека 61 проценти од жените во зрела возраст се задоволни од сексуалниот живот, дури и кога немаат секс редовно.

Околу 67 проценти од учесничките велат дека успеваат да доживеат задоволство секој пат кога ќе се оддаваат на интимни бакнежи.

Желбата за секс сепак се намалува во староста, особено по менопаузата. Податоците од истражувањето покажуваат дека 40 проценти од жените ретко имаат желба за секс.

Истражувачите утврдиле уште дека задоволството од сексот е поголемо кај жените, кои се радуваат на физичката и емоционална близина со партнерите.