Науката го потврди тоа што одамна се знае: и мажите и жените сакаат згодни, слаби и богати партнери. Помалку привлечните мажи можат да ги „надоместат“ недостатоците со пари, а жените - со образование...

На атрактивните жени не им е толку важен надворешниот изглед и вишокот килограми на нивните партнери, се додека нивните паричници се „подебели“, покажаа резултатите од едно ново истражување. Како што пишува New York Post, истражувачите од универзитетот Колумбија направиле математичка формула со чија помош може да се пресмета до која мерка и жените и мажите се подготвени на компромис при изборот на партнер, ако се земаат во обѕир, на пример, надворешниот изглед и финансиската состојба.

Според економистот Пјер Андре Чапори, осамените луѓе кои бараат партнери ги бираат на основа на две особини - физичка и социјално-економска привлечност.

Останатите фактори, како смислата за хумор и добрата душа играат помала улога, заклучиле Чапори и неговите соработници врз основа на анализата на податоците добиени од 667 американски парови.

Според истражувањето на овие „очигледни“ работи, и мажите и жените претпочитаат згодни, слаби и богати партнери. Меѓутоа, помалку привлечните мажи можат да ги „надоместат“ недостатоците со пари, а жените - со образование.

Според „Формулата на Чапори“ во која се употребува „индекс на телесна маса“ (кој се добива со делење на тежината со висината), за да се најде привлечна партнерка, со секое покачување за 10% од телесната маса, мажот мора да го зголеми годишниот приход за 2%.

„Маж висок 180 сантиметри, тежок 80 килограми со 100.000 долари годишен приход треба да поче да заработува 2.000 долари повеќе, доколку добие приближно 9 килограми тежина. Доколку пак жена од 170 сантиметри и тешка 65 килограми, се здебели за 3 килограми, треба да се образува уште една година за да добие квалификација и да остане привлечна“, објаснува Чапори.

Според неговите зборови, заклучоците на истражувањето се дека физичката надворешност не е „ништо страшно“ и лесно може да се компензира. Меѓутоа, истражувачите сепак советуваат - полесно е едноставно да се симнат неколку килограми.

„Поедноставно е да се промени индексот на телесна маса отколку заработувачката или нивото на образование“, заклучува Чапори.