Режисерот Кијт Ален вчера во Кан го претстави филмот Unlawful Killing, кој зборува за смртта на принцезата Дијана...

Кијт Ален реагираше на оптужбите дека тој филм го напаѓа британското кралско семејство и дека во целост е финансиран од страна на Мухамед Ал-Фајед.

Бизнисменот Мухамед Ал-Фајед, чиј син Доди умре заедно со Дијана во сообраќајната несреќа во 1997 година во Париз, цврсто верува дека британското кралско семејство не сакало Дијана да се омажи за муслиман. Верува дека парот е убиен по налог на сопругот на кралицата, прицнот Филип.

Ален документарецот го опиша како форензичен. Филмот во еден дел се фокусира на 2007/2008 година истражувајќи ја смртта на Дијана и начинот на кој ја следеле британските медиуми. Имено, режисерот забележува дека медиумите трагедијата ја следеле на непримерен начин поради притисок од страна на Дворот.

„Важно е публиката да сфати што се случи во истрагата, кои пропусти се направени. Мислам дека овој филм не е сензационалистички, ниту сакав да го направам таков. Мислам дека филмот е форензичка анализа на спорведена истрага која, според мое мислење, мора да се преиспита. Тоа е накратко тоа за што се работи во филмот“, рече Ален на конференцијата за новинари во Кан.

Ален е критикуван поради тоа што неговиот филм е во целост финансиран од страна на Фајед и тоа со 4.1 милиони долари.

Истрагата на француската и британската полиција покажа дека смртта на Дијана и Доди е последица од пребрзо возење на пијан возач. Документарецот покажува фотографија од мртвата Дијана.

„Нема да има никакви длабоки воздивнувања кога ќе ја видите фотографијата од Лејди Ди. Тоа не е ништо сензационално или шокирачко, како што луѓето мислат дека ќе биде. Тоа е само дел од приказната која се обидува да објасни што всушност се случило“, тврди Ален.

Не се знае кога филмот ќе биде прикажан во Велика Британија.