Tobey Maguire и Sam Raimi, режисерот на "Spider-Man", планираат повторно да се здружат за 4-тото и 5-тото продолжение на филмската екранизација на популарниот стрип, демантирајќи ги шпекулациите дека филмската компанија Columbia Pictures е во потрага по нов актер кој ќе ја толкува главната улога.

Претставникот на компанијата Steve Elzer изјави: ”Воопшто не бевме во потрага по ново лице.  Tobey беше и останува единствен избор и единствена личност со која дискутуиравме за улогата на Spider-Man.“

Сепак, со намера да ги намали продукциските трошоци Columbia размислува да ги сними обете продолженија истовремено, пролетта 2009 година. На сличен потег се одлучи и New Line со “The Lord of the Rings“ трилогијата која беше снимена симултано во период од 274 денови.

Сценариото го пишува Jamie Vanderbilt , а продуцентите се надеваат дека "Spider-Man 4" ќе  биде готов за прикажување до мај 2011 година, 9 години по оригиналниот филм. Продуцентите засега молчат околу идните негативци во следните две продолженија и одбиваат да коментираат дали Kirsten Dunst ќе ја репризира улогата на Mary Jane Watson.

 "Spider-Man" е најуспешната филмска франшиза на Columbia Picture. Првите 3 продолженија им донесоа заработка од 2,5 милијарди долари во светски рамки.