Ако и веруваме на ѕвездата од Матрикс, браќата Ваховски припремаат дури две нови продолженија на хит серијалот...

Имено, на прес-конференцијата во Лондон, одржана по повод промоцијата на својот нов филм Henry's Crime, Кијану Ривс покрена лавина од гласини, откако рече дека режисерите Лери и Ендру Ваховски планираат да снимат не уште едно, туку уште две продолженија на филмот Матрикс.

Како што известува порталот Ain't It Cool News, Кијану за време на божиќните празници се сретнал со браќата Ваховски, кои тогаш му рекле дека ќе направат две предлог-сценарија за четвртото и петтото продолжение на научно-фантастичниот серијал во кој Ривс повторно ќе се појави во улогата на Нео.

Но, тоа не е се, затоа што браќата Ваховски се сретнале со режисерот Џејмс Камерон за да се договорат за потенцијалното користење на 3D технологијата за продолженијат на Матрикс, а Ривс тврди дека доколку филмовите бидат снимени во 3D технологија, ќе го револуционираат акцискиот жанр на исти начин на кој што го стори тоа и првиот дел од филмот.

Ривс потврди дека штом браќата Ваховски завршат со работење на филмот Cloud Atlas повторно ќе се сретнат за договарање пред почетокот на снимањето.