Новинарот кој ја обвини за кражба на сценариото за филмот „Во земјата на крвта и медот“ изгуби на судот.

Јосип Кнежевич, хрватски новинар кој под псевдонимот Џејмс Бредок ја напишал книгата „Кршење на душите“ во 2007, ја тужеше Анџелина Џоли во очи на излегувањето на нејзинот режисерски првенец за војната во поранешна Југославија, за која сама го напишала и сценариото.

Бредок тврдеше дека значајни делови од заплетот на филмот од 2011 се преземени од неговата книга напишана четири години порано, и ја тужеше Анџелина.

„Кршење на душите“ е приказна за бракот на Хрватка и муслиман, кои се раздвоени од војната, додека во приказната на Анџелина во фокусот е љубовна приказна на муслиманка и Србин. Судијата Доли Џи пресудила дека едноставно не постојат доволно сличности за Кнежевич да докаже „кражба“.

„Двете приказни имаат сцени на бегство и силување, и двете се љубовни приказни, но тоа се вообичаени мотиви во прикажување на војна. Заплетите немаат доволно слични елементи, а Кнежевич не може да тврди дека тој го измислил концептот на љубов или силување и на основа на тоа да бара наводна правда“, се наведува во заклучокот на судијата.