Филмот Amour на режисерот Михаел Ханеке е прогласен во ноќта меѓу петокот и саботата на церемонија во Париз за најдобар филм на 38 доделување на француските филмски награди Цезар.

Австрискиот режисер доби Цезари и за најдобра режија и за сценарио на филмот за стареењето и смртта - Amour.

Остварувањето на Ханеке е наградено и на минатогодишниот фестивал во Кан, а денеска на доделувањето на Оскар е номиниран во пет категории.

За најдобра женска и машка улога, исто така во филмот Amour, Цезари во Париз добија Емануел Рива, која исто така е кандидатка за Оскар, и Жан Луи Тринтигнант.

Кевин Костнер доби награда за животно дело, а Цезар за најдобар странски филм му е врачен на Бен Афлек за Аrgo кој е кандидат и за Оскар.