Се ближи доделувањето на едни од најзначајните филмски признанија на светот, а првиот дел од трилогијата на Питер Џексон веќе се најде на листата добитници.

На церемонијата која претходи на доделувањето на Оскарите, американската филмска академија Сајмон Клатербак, Џејмс Џејкобсон и Ричард Дорлинг ги награди за допринос во развој на технологијата која компјутерски создадените суштества ги прави многу реални.

Нивните иновации режисерот Питер Џексон ги искористи за создавањето на ликовите во филмот „Хобитот: Неочекувано патување“, а еден од најинтересните ликови е Голум, благодарение на кој тие тројца се најдоа меѓу наградените.

Еден од наградените е и Ричард Мол за пронаоѓање на преносен уред за разместување на светлината Matthews Max Menace Arm кој е користен во снимањето на повеќе од 300 филмови, а на листата добитници е и студиото Dreamworks за посебни светлосни ефекти кои се користени во остварувањата какви што се „Шрек“ и „Мадагаскар“.

Свеченото доделување на Оскарите ќе биде одржано на 24 февруари во Лос Анџелес.