Наградите на Британската филмска академија, британската верзија на Оскарите, доделени се во недела во Лондон.

Во конкуренцијата најдобар филм, победата ја однесе Argo на режисерот Бен Афлек, победувајќи ги остварувањата „Клетници“, „Животот на Пи“, „Линколн“ и „Тајна операција“. Афлек е награден и за режија.

Најдобар британски филм е новиот Бонд, Skyfall, а ги победи филмовите „Најдобриот егзотичен Мериголд хотел“, „Ана Каренина“, „Клетници“ и „Седум психопати“.

Во категоријата главни улог триумфираа Даниел Деј-Луис („Линколн“) и Емануел Рива (Amour). Најдобри споредни улоги остварија Кристоф Валц (Django Unchained) и Ен Хетавен („Клетници“).

Филмот Amour на Микаел Ханек освои награда и за најдобар филм надвор од англиско говорно подрачје. Најдобар документарец е Searching for Sugar Man, а најдобар анимиран филм е „Храбра“.

Новиот филм за Бонд е награден и за оригинална музика (Томас Њуман), а „Клетници“ освоија уште три BAFTA награди - за сценографија, шминка и звук.