Анимираниот филм „Разбивачот Ралф“ освои награда за најдобар анимиран филм на овогодинешното доделување на Ени наградите, кои ги доделува Меѓународното друштво за анимиран филм.

Комедијата за негативецот кој сака да стане херој во сабота вечер ја освои наградата за најдобар анимиран филм, а со него во категорија се најдоа „Храбра“, „Франкенвини“, „ПараНорман“ и „Хотел Трансилванија“.

„Разбивачот Ралф“ на кого гласот му го позајмува Џон Рајли доби уште признанија на доделувањето на Ени наградите вклучувајќи и награда за најдобра режија, за музика и сценарио.

Меѓу играните филмови остварувањето „Одмазници“ освои Ени награда за анимирани ефекти, додека филмот „Животот на Пи“ освои награда за најдобра карактерна анимација.

Меѓународното друштво за анимиран филм од 1972 година ги доделува наградите Ени.