Тенисерот ќе има епизодна улога во мексиканската верзија на „Озборувачка“, објавија продуцентите.

Американската верзија на „Озборувачка“ заврши по шестата сезона кон крајот на минатата година, а на фановите им го претстави скандалозниот свет на сплетките, романтиката и високото друштво во Менхетн.

Продуцентот Педро Торес најави снимање на мексиканска верзија, која ќе се вика „Озборувачка: Акапулко“, а една епизода ќе сними и Рафаел Надал. Снимањето на првите епизоди веќе почнало во Акапулко.

„Зборувавме со луѓето на Рафаел и заинтересирани се за соработка. Рафаел ќе биде кај нас за време на турнирот Акапулко Опен од 25 февруари до 2 март и кога ќе му дозволат обврските, ќе ги сними своите сцени“, откри Торес.

Продуцентот не откри каква ќе биде улогата на Рафаел, но не се сомневаме дека тенисерот ќе се снајде одлично, бидејќи актерските вештини веќе ги покажа во спотот на Шакира Gypsy.